REAL KLINIK MA'LUMOTLAR VA SUN'IY INTELLEKT ASOSIDA DORI VOSITALARINING SAMARADORLIGINI BAHOLASH

Dori vositalarining samaradorligini ishonchli baholash zamonaviy klinik farmakologiya, farmakonazorat va sog‘liqni saqlash boshqaruvidagi ustuvor vazifalardan biridir. Randomizatsiyalangan nazoratli klinik sinovlar preparatning ideal sharoitdagi klinik samaradorligini aniqlash uchun eng muhim metod bo‘lib qolsa-da, ular ko‘pincha kundalik amaliyotdagi bemorlar xilma-xilligini to‘liq aks ettirmaydi. Elektron tibbiy kartalar, kasallik registrlari, laboratoriya ma’lumotlari, elektron retseptlar, farmakonazorat tizimlari, sug‘urta bazalari va bemor qayd etgan natijalardan iborat real klinik ma’lumotlar preparatlarning amaliy sharoitdagi haqiqiy samaradorligi hamda xavfsizligini baholash imkonini beradi.